Avètz segurament costuma d’anar entendre parlar occitan dins los luòcs de vida coma la plaça del vilatge, un jorn de mercat, o dins de moments anodins. Pr’aquò, se cal pas amagar lo fait que l’emplec de l’occitan dins la vida vidanta es a demesir fòrtament. Aquel recuol demòra pas vièlh. Lo Labèl Òc per l’occitan foguèt creat per l’Ofici per l’occitan en partenariat amb l’Institut d’Estudis Occitans per tornar lançar l’emplec de l’occitan dins la vida de cada jorn.

Coma reconéisser aquel label ?

Es botat en evidéncia dins los comèrcis, entrepresas, associacions o dins las professions liberalas jos la forma d’un logo declinat segon tres nivèls de certificacion. De mai, las estructuras que pòrtan lo label Òc per l’occitan son recensadas dins un annuari imprimit cada an, coma tanben sul site www.occitan-oc.org. Es aital possible d’anar far sas crompas o d’aprofieitar maites servicis en occitan, doncas de tornar far ganhar la plaça de l’occitan dins la vida vidanta, de contribuir al desvolopament d’una economia de proximitat, una economia occitana, en occitan.

Obténer lo label

Far l’aquisicion del label Òc per l’occitan es l’expression d’una volontat de mostrar una identitat originala. Es afichar una sensibilitat, una afeccion de cap a la lenga occitana e aital ne favorizar l’emplec dins la vida sociala. Es tanben dintrar dins un malhum de consomators demandaires d’un servici en occitan, de productes amb d’occitan clarament afichat. Aquò permet doncas de tocar un public nòu. Enfin, permet de desvolopar mai d’escambis amb los autres païses de lenga romanica (Catalonha, Espanha, Portugal…)

D’autres avantatges :

Òc per l’occitan assegura tanben la promocion de l’apellacion e de sos aderents gràcias a mai d’un biais : conferéncias de premsa, expausicion dins las fièras de productors, material permetent de valorizar l’occitan dins son activitat, conselhs linguistics e de reviradas per diferents supòrts publicitaris, possibilitat de formar lo personal a las basas de la lenga occitana.

Per mai d’entresenhas :

Ofici per l'occitan

42 carrièra dels blanquièrs

31000 Tolosa

05 67 00 65 31

ofici@occitan-oc.org

www.occitan-oc.org